កំពង់ចាម៖ សម្តេចតេជោ ហ៊ុន សែន ប្រកាសថា ក្រោយយុទ្ធនាការឃោសនា និង ការបោះឆ្នោត សម្ដេចនឹងបន្តចុះជួបសំណេះសំណាលជាមួយ កម្មករ-កម្មការិនី នៅតាមបណ្ដារោងចក្រជាបន្តទៀត ខណៈក្នុងដំណាក់កាលយុទ្ធនាការឃោសនាបោះឆ្នោតសម្ដេចនឹងផ្អាកសកម្មភាពនានាមួយរយៈសិនដើម្បីកុំឱ្យខុសនឹងច្បាប់បោះឆ្នោត។
ថ្លែងនៅក្នុងពិធីជួបជាមួយនឹងកម្មករជិត២ ម៉ឺននាក់ក្នុងស្រុកជើងព្រៃ ខេត្តកំពង់ចាម ព្រឹកថ្ងៃទី១៦ ខែមិថុនា ឆ្នាំ២០២៣នេះ សម្ដេចតេជោហ៊ុនសែនបានថ្លែងថា៖«ឥលូវខ្ញុំស្នើថាបន្ទាប់ពីការជួប១៨លើកនេះ យើងនៅសល់ប៉ុន្មានកន្លែងទៀត យើងអាចទៅរកការជួបកម្មករក្នុងរយៈពេលពីក្រោយការបោះឆ្នោតទៅដល់ការបង្កើតរដ្ឋាភិបាលថ្មី»។
សម្តេចតេជោបានបញ្ជាក់ថា សម្តេចនឹងត្រូវផ្អាកការចុះសំណេះសំណាលជាមួយកម្មករ-កម្មាការនីមុនយុទ្ធនាការបោះឆ្នោត ព្រោះថាបើចុះទៅតាមរោងចក្រក្នុងពេលយុទ្ធនាការឃោសនាបោះឆ្នោត មានការផ្តល់អំណោយ និងផ្តល់ម្ហូបអាហារផ្សេងៗ គេនឹងផាកពិន័យ ព្រោះជាការខុសនឹងច្បាប់បោះឆ្នោត។
សម្តេចតេជោគូសបញ្ជាក់ថា ការដែលសម្តេចចុះជួបជាមួយកម្មករ-កម្មការិនីនេះគឺសម្តេចចង់ដឹងសុខទុក្ខ ស្ថានភាពរបស់កម្មករ-កម្មការិនី៕
